പഞാബിലെ ജലന്ധറില്‍ ഞാന്‍ ജോലി ചെയ്തിരുന്നപ്പോള്‍ അവിടുത്തെ ടെക്നിക്കല്‍ സെക്ഷന്റെ ഹെഡ് ആയിരുന്നു സുബേദാര്‍ മേജര്‍ താക്കൂര്‍ സാബ്. ഹിമാചല്‍ പ്രദേശ്കാരനായ താക്കൂര്‍ സാബിനെ കണ്ടാല്‍ നമ്മുടെ സിനിമാ നടന്‍ പറവൂര്‍ ഭരതനെ കാണുന്നത് പോലെയാണ്. വെളുത്തു തടിച്ചു കുറുകിയ ശരീരവും വലിയൊരു കുടം വയറിനു മുകളില്‍ ഫിറ്റ് ചെയ്ത മാതിരിയുള്ള കുടവയറും കൊമ്പന്‍ മീശയും കഷണ്ടിത്തലയും ചേര്‍ന്നാല്‍ പോലീസ്സ് തയ്യാറാക്കുന്ന പിടികിട്ടാപുള്ളികളുടെ ഫോട്ടോ പോലെ, താക്കൂര്‍ സാബിന്റെ ഏകദേശ രൂപമായി. ക്ഷിപ്രകോപിയും എന്നാല്‍ ഉടനെ തന്നെ ഐസ്കട്ടപോലെ തണുക്കുന്ന സ്വഭാവക്കാരനുമായ താക്കൂര്‍ സാബിനു ഞങള്‍ മലയാളികള്‍ "കുടം" എന്ന ഓമനപ്പേരും അദ്ദേഹത്തോട് പിണക്കമുള്ള ഹിന്ദിക്കാര്‍ "പേട്ടുറാം" എന്ന ഓമനയല്ലാത്ത പേരും കൊടുത്തിരുന്നു. മലയാളം ഒട്ടുംതന്നെ വശമില്ലാതിരുന്ന താക്കൂര്‍ സാബ് വരുന്നത് കാണുമ്പോഴേ "ടാ കൊടം വരുന്നുണ്ട്" എന്ന് അദ്ദേഹം കേള്‍ക്കെ തന്നെ വിളിച്ചു പറയാനുള്ള ധൈര്യം ഞങള്‍ മലയാളികള്‍ക്ക് ഉണ്ടായിരുന്നു എന്ന സത്യം ഞാന്‍ നിങ്ങളെ അറിയിച്ചു കൊള്ളട്ടെ.
അങ്ങനെയുള്ള താക്കൂര്‍ സാബിന്റെ സന്തത സഹചാരിയാണ് ബജാജ് കമ്പനിയുടെ "ചേതക്" എന്ന സ്കൂട്ടര്‍. ടെക്നിക്കല്‍ സെക്ഷന്റെ ഹെഡ് ആയിരുന്നത് കൊണ്ടാണോ എന്നറിയില്ല അദ്ദേഹത്തിന്റെ വണ്ടിയില്‍ ഹെഡ് ലൈറ്റ് , ബ്രേക്ക്, മുതലായ നിത്യോപയോഗ സാധനങ്ങള്‍ ഉണ്ടായിരുന്നില്ല. എന്തിനു പറയുന്നു, വണ്ടി ഓണ്‍ ചെയ്യാനുള്ള താക്കോല്‍ പോലും ഉപയോഗിക്കുന്നത് താക്കൂര്‍ സാബിനു ഇഷ്ടമുള്ള കാര്യമായിരുന്നില്ല. പകരം ഹെഡ് ലൈറ്റിന്റെ ബള്‍ബ് ഇടാനുള്ള ദ്വാരത്തില്‍ കൂടി പുറത്തക്ക് എടുത്തിരിക്കുന്ന രണ്ടു വയറുകള്‍ കൂട്ടി മുട്ടിച്ചാല്‍ വണ്ടി സ്റ്റാര്‍ട്ട് ആക്കുന്നതിനുള്ള ഒന്നാം ഘട്ടം പൂര്‍ത്തിയാകും. പിന്നീടുള്ള രണ്ടാം ഘട്ടമാണ് താക്കൂര്‍ സാബിന്റെ ആരോഗ്യരഹസ്യം എന്നു വേണമെങ്കില്‍ പറയാം. എന്തെന്നാല്‍ അത് സ്റ്റാര്‍ട്ട് ആക്കുകയെന്നത് ഒരു അന്താരാഷ്ട്ര സംഭവം തന്നെയാണ്. പിണങ്ങിപ്പോയ ഭാര്യയെ തിരിച്ചു കൊണ്ടുവരുവാന്‍ പാടുപെടുന്ന ഭര്‍ത്താവിനെപ്പോലെ പലരീതിയില്‍ അനുനയിപ്പിച്ചാല്‍ മാത്രമേ താക്കൂര്‍ സാബിന്റെ സ്കൂട്ടര്‍ അനുസരിക്കൂ. താക്കൂര്‍ സാബ് രാവിലെ ഓഫീസിലേക്ക് പോയെന്ന് ഉറപ്പായതിനു ശേഷം മാത്രമേ ഞങ്ങള്‍ അദ്ദേഹത്തിന്റെ മുറിയുടെ അടുത്ത്‌ കൂടി പോകാറുള്ളൂ. അല്ലെങ്ങില്‍ സ്കൂട്ടര്‍ സ്റ്റാര്‍ട്ട് ആക്കുന്നതിനുള്ള ഉത്തരവാദിത്ത്വം അദ്ദേഹം നമ്മളെ ഏല്പിച്ചുകളയും! പിന്നെ അന്നത്തെ ദിവസം കട്ടപ്പുക !!
ഇതൊക്കെയാണെങ്കിലും എന്റെ കൂടെയുണ്ടായിരുന്ന മിക്കവാറും എല്ലാ ചെറുപ്പക്കാരും ടൂ വീലര്‍ ഓടിക്കുവാന്‍ പഠിച്ചത് താക്കൂര്‍ സാബിന്റെ വണ്ടിയിലാണ്. എങ്ങനെയെന്നു ചോദിച്ചാല്‍ നൈറ്റ് ഷിഫ്റ്റ് ഉള്ള ദിവസം രാവിലെ റൂമില്‍ എത്തുന്ന താക്കൂര്‍ സാബ്, കുളിയും പൂജയും കഴിഞ്ഞു ജെ.സി. ഓ. മെസ്സിലെത്തി രണ്ടു ലാര്‍ജും വിഴുങ്ങി തിരിച്ചു മുറിയിലെത്തി ഒരു ടവല്‍ മാത്രമുടുത്ത് ഉറങ്ങാന്‍ കിടക്കും. ഏകദേശം അര മണിക്കൂര്‍ കഴിയുമ്പോള്‍ മുറിക്കുള്ളില്‍ നിന്നും ഉച്ചസ്ഥായിയിലുള്ള കൂര്‍ക്കം വലി ഉയരുന്നതോടെ ഞങ്ങളുടെ ടൂ വീലര്‍ ഡ്രൈവിങ്ങ് ട്രെയിനിംഗ് ആരംഭിക്കുകയായി.
ജെ സി ഓ മെസ്സിന്റെ വരാന്തയോട് ചേര്‍ന്ന് ഏറ്റവും അറ്റത്തുള്ളതാണ് താക്കൂര്‍ സാബിന്റെ മുറി. മുറിയുടെ പുറകു വശത്ത് ജനാലയും അതിനോടെ ചേര്‍ന്ന് അരമതിലും മതിലിനപ്പുരത്തു മൈതാനവുമാണ്. മൈതാനം കഴിഞ്ഞാല്‍ റോഡും ചെറിയ കടകളും ഒരു വര്‍ക്ക് ഷോപ്പും ഉണ്ട്. മുന്‍വശത്തെ വാതില്‍ ചാരിയ ശേഷം പുറകിലത്തെ ജനാല തുറന്നിട്ടു കിടന്നാണ് താക്കൂര്‍ സാബ് ഉറങ്ങുക. ഉറക്കത്തിന്റെ കാര്യത്തില്‍ സാക്ഷാല്‍ കുംഭകര്‍ണന്‍ പോലും താക്കൂര്‍ സാബിനോടെ മത്സരിക്കില്ല എന്നു ഞങള്‍ പറയാറുണ്ട്‌. കൂര്‍ക്കം വലി ഉയരുന്നതോടെ മുറ്റത്തിരിക്കുന്ന സ്കൂട്ടര്‍ തള്ളി അല്പം ദൂരെ കൊണ്ടുപോയി സ്റ്റാര്‍ട്ട് ചെയ്തു ഡ്രൈവിങ്ങ് ട്രെയിനിംഗ് തുടങ്ങും. പഞാബിയായ പവന്‍കുമാറാണ് ഗുരു. പവന്‍കുമാര്‍ തൊട്ടാല്‍ ഉടന്‍ തന്നെ വണ്ടി സ്റ്റാര്‍ട്ട് ആകും . എന്താണ് അതിന്റെ ഗുട്ടെന്‍സ് എന്നു ഇതുവരെ ഞങള്‍ക്ക് പിടികിട്ടിയിട്ടില്ല.
അങ്ങനെ എല്ലാവരും ടൂ വീലര്‍ പഠിച്ചതോടെ എനിക്കും അതൊന്നു പഠിച്ചാലോ എന്നു ഞാന്‍ ആലോചിച്ചു. പവന്‍ കുമാറിനോട് വിവരം പറഞ്ഞു. അവന്‍ സമ്മതിച്ചു. നല്ല സൈക്കിള്‍ ബാലന്‍സ് ഉണ്ടെങ്കില്‍ രണ്ടു മണിക്കൂര്‍ കൊണ്ട് സ്കൂട്ടര്‍ ഓടിക്കാന്‍ പഠിക്കാം എന്നു പവന്‍ കുമാര്‍ പറഞ്ഞതോടെ അടുത്ത ദിവസം തന്നെ സംഗതി ഞങള്‍ പ്രാവര്‍ത്തികമാക്കി
സ്കൂട്ടര്‍ സ്റ്റാര്‍ട്ട് ചെയ്തു ഗിയറില്‍ ഇട്ടിട്ടു എന്നെ അതില്‍ ഇരുത്തി ക്ലെച്ച്‌ എന്നു പറയുന്ന സാധനം പതുക്കെ അയച്ചു ആക്സിലേറ്റര്‍ കൊടുക്കാന്‍ പവന്‍കുമാര്‍ പറഞ്ഞപ്പോള്‍ ഞാന്‍ അങ്ങനെ ചെയ്തു. വണ്ടി മുന്‍പോട്ടു പോയി. അല്പം ദൂരെ ചെന്നപ്പോള്‍ ഇരുവശത്തും തൂണ് പോലെ കവച്ചു വച്ചിരുന്ന കാലുകള്‍ പൊക്കി വണ്ടിയില്‍ വച്ച് അലപം സ്റ്റൈലില്‍ തന്നെ ഇരുന്നു കുറച്ചു ദൂരം ഓടിച്ചു. അതോടെ എന്റെ ആത്മവിശ്വാസം ഇരട്ടിച്ചു. മുറ്റത്തിന്റെ അങ്ങേ അറ്റം വരെ ഓടിച്ചു ശേഷം സ്പീഡില്‍ തന്നെ തിരിച്ചു വന്ന ഞാന്‍ മുറ്റത്തു കിടന്ന കല്ലിന്റെ പുറത്തു കയറാതിരിക്കാനായി വണ്ടി വെട്ടിച്ചു. വണ്ടി അല്പം ചെരിഞ്ഞു. അതോടെ ആനപ്പുറത്ത് ബാലന്‍സ് പിടിച്ചിരിക്കുന്ന കുരങ്ങന്റെ സ്റ്റൈലില്‍ സ്കൂട്ടെരിന്റെ പുറത്തിരിക്കുന്ന ഞാന്‍ മറിഞ്ഞു വീഴാതിരിക്കാനായി ആക്സിലേറ്ററില്‍ മുറുക്കെ പിടിക്കുകയും തദ്വാര വണ്ടി ഇരട്ടി സ്പീഡില്‍ മുന്‍പോട്ടു കുതിച്ചു നേരെ വരാന്തയില്‍ കയറി താക്കൂര്‍ സാബിന്റെ മുറിയുടെ വാതില്‍ ഇടിച്ചു തുറന്നു, ഉറങ്ങിക്കിടക്കുന്ന താക്കൂര്‍ സാബിന്റെ കട്ടിലിനടുത്തുള്ള മേശയില്‍ തട്ടി മറിയുകയും ചെയ്തു. ഇതിനിടയില്‍ തന്നെ വളരെ വിദഗ്ദമായി വണ്ടിയില്‍ നിന്നും ചാടുകയും വരാന്തയില്‍ നടുവടിച്ചു വീഴുകയും ചെയ്ത വിവരം ഞാന്‍ അറിഞ്ഞില്ല എങ്കിലും അവിടെ നിന്നവരൊക്കെ aതു വളരെ വ്യക്തമായിത്തന്നെ കാണുകയുണ്ടായി.
ടവല്‍ മാത്രമുടുത്ത് വായും പൊളിച്ചു കൂര്‍ക്കം വലിച്ചു കൊണ്ടിരുന്ന താക്കൂര്‍ സാബ് എന്താണ് സംഭവം എന്നു മനസ്സിലാക്കാതെ വല്ല ഉഗ്രവാദി ആക്രമണവും ആയിരിക്കും എന്നു കരുതി ഞെട്ടിപ്പിടഞ്ഞെഴുനെല്‍ക്കുകയും ജനാല വഴി പുറത്തു ചാടി മതിലിനു മുകളിലൂടെ മൈദാനത്തിലെത്തി ശരം പോലെ പാഞ്ഞു പോവുകയും ചെയ്തു. അദ്ദേഹമുടുത്തിരുന്ന ടവല്‍ മാത്രം എന്ത് വന്നാലും നേരിടാന്‍ തയ്യാറെന്ന മട്ടില്‍ കട്ടിലില്‍ കിടന്നിരുന്നു.
വീണു കിടന്ന എന്നെ പവന്‍ കുമാറും മറ്റുള്ളവര് ചേര്‍ന്ന് പിടിച്ചുയര്‍ത്തി. ഒരാള്‍ പോയി മുറിക്കുള്ളില്‍ നിന്നും സ്കൂട്ടര്‍ കൊണ്ടുവന്നു. 'പണ്ടേ ദുര്‍ബല പോരാത്തതിനു ഗര്‍ഭിണി' എന്നു പറയുന്നപോലെ അതിന്റെ ഷേപ്പ് മൊത്തമായും മാറി ഏതാണ്ട് ചളുങ്ങിയ പുട്ടുകുടം പോലെ ആയ സ്കൂട്ടര്‍ കണ്ട ഞാന്‍ ഒപ്പം തന്നെ ഓട്ടം കഴിഞ്ഞു കുഴപ്പമൊന്നുമില്ല എന്നു മനസ്സിലാക്കി തിരിച്ചു വന്നിരിക്കുന്ന താക്കൂര്‍ സാബിനെയും കണ്ടതോടെ ഇനി എന്ത് ചെയ്യണം എന്നറിയാതെ കുഴങ്ങി. എന്റെ ഗുരു പവന്‍ കുമാറും കൂടെ എന്നെ പ്രോത്സാഹിപ്പിക്കാന്‍ നിന്നവരും താക്കൂര്‍ സാബ് വന്നതോടെ മുങ്ങി. അനുവാദമില്ലാതെ സ്കൂട്ടര്‍ എടുത്തതിനും ഉറങ്ങിക്കിടന്ന താക്കൂര്‍ സാബിനെ ഭയപ്പെടുത്തിയത്തിനും കൂടി രണ്ടു കേസ്സുകള്‍ എന്റെ പേരില്‍ ചാര്‍ജ് ചെയ്യപ്പെടുകയും ചെയ്യുമെന്ന് എനിക്കുറപ്പായി. പിന്നെ അണ്ടര്‍വെയര്‍ ധാരിയായി കോപിച്ചു നില്‍ക്കുന്ന താക്കൂര്‍ സാബിനു മുന്‍പില്‍ നിരുപാധികം കീഴടങ്ങുവാനും മേല്‍പ്പടി പുട്ടുകുടത്തിനെ തിരിച്ചു സ്കൂട്ടര്‍ പരുവത്തിലാക്കാനുള്ള സകല വിധ ചിലവുകളും ഞാന്‍ തന്നെ സ്വമേധയാ നിര്‍വഹിച്ചു കൊള്ളാമെന്നും ധാരണയാവുകയും പുട്ടുകുടത്തിനെ ഓട്ടോയില്‍ കയറ്റി അടുത്തുള്ള വര്‍ക് ഷോപ്പില്‍ എത്തിക്കുകയും ചെയ്തു.
വര്‍ക്കു ഷോപ്പുകാരന്‍ പുട്ടുകുടത്തെ കൊമ്പും കുഴലും വച്ച് പരിശോധിച്ച് അതിനു നേരത്തെ തന്നെ ഇല്ലാതിരുന്ന ബ്രേക്ക്, ഹെഡ് ലൈറ്റ് മുതലായ സാധന സാമഗ്രികളുടെ വിലയും റിപ്പയറിംഗ് ചാര്‍ജും ചേര്‍ത്ത് രണ്ടായിരത്തി ഇരുനൂറു രൂപയുടെ ബില്ല് തന്നതോടെ എന്റെ ടൂവീലും ഊരിപ്പോയി എന്നു പറഞ്ഞാന്‍ മതിയല്ലോ..
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ